O le Aso Gafua na te’a nei, 24 o Me 2021, o le aso lea na faatoa aloaia ai lo outou finagalo Samoa e ala i la outou filifiliga i le palota tele o le aso 9 o Aperila, lea ua atoa le 6 vaiaso o faataamilomilo pea e le faigamalo le tumau ma Ofisa o le Malo. Ma ua le aloaia ma faataunuuna o latou tiute faa-le-tulafono ma taofiofia ai le faagaoioiga masani o faigamalo faa-temokalasi – e filifili e tagata le faigamalo latou fingalo e taitaia ma pulea i latou.
O le tatou Vaega Faaupufai lenei a le Fa’atuatua I Le Atua Samoa ua Tasi, e taofi mau ile talitonuga i le Atua soifua ma lona finagalo o loo tasi ai lo tatou talitonuga.
O le faaiuga o le Faiga Palota tele a lo tatou atunuu, e ta’i 25 nofoa na umia e Vaega Faaupufai e lua. Ma i le aso 21 o Aperila, na filifili ai le Sui Tuto’atasi e lagolago la tatou Vaega Faaupufai, ma maua ai loa nofoa e 26 a le FAST i le 25 a le HRPP, ma mafai ai loa ona faatu se faigamalo a le FAST.
Ae peita’i, i leva o le po, ae lei faasilasilaina aloaia le afio mai o le Sui Tutoatasi, na fautuaina ai ele Komesina o Faigapalota le flifilia o se sui tamaitai faaopopo i lalo o le teuteuga o le Faavae o le tausaga e 2016, ma tulai mai ai se faafitauli ina ua tau fai 26 ile 26 nofoa ua umia e Vaega Faaupufai e lua.
Na o tatou saili ile Faamasinoga ile le talafeagai o lea laasaga na faia e tusa ai ma le tulafono e pei ona faasilasilaina e le Ao o le Malo. Ae peitai, o le po ole aso e sosoo ma le tagofia o lenei mataupu e le Faamasinoga, ae ua toe aumai foi se isi Poloaiga a le Ao o le Malo i le aso 9 o Me, ma faaleaogaina ai ia le faaiuga o le faiga palota tele, ma valaau ai se isi faiga palota fou e faia I le aso 21 o Me. O se tasi o mafuaaga, ona o le tulaga tutusa o nofoa ua umia e itu e lua.
Na talosagaina foi e le tatou Vaega Faaupufai le Faamasinoga ma aumai ai lana faaiuga e faapea:
1. E le tusa ai ma le Tulafono le filifilia o le sui tamaitai na faaopopo;
2. Ele tusa ai ma le Tulafono le Poloaiga na faaleaogaina ai le faaiuga o le Faiga Palota Tele;
3. E aloaia pea le Poloaiga a le Ao o le Malo o le aso 20 o Me, ia tauaofia le Palemene ile Aso Gafua, 24 o Me ma le fa’asinoga ina ia faataunuuina lava lea tauaofiaga.
Peitai, ua toe faia foi se isi gaoioiga i le po o le Aso Toonai na te’a nei, 22 o Me e ala e le isi Poloaiga a le Ao o le Malo, e faaleaogaina ai le uluai Poloaiga, mo le tauaofiaga a le Palemene.
O le Aso Sa 23 o Me, na tuuina atu ai se talosaga faanatinati a le tatou Vaega Faaupufai i le Faamasinoga ona o le Aso Gafua, e tatau ona tauaofia ai le Palemene. Ma na tuuina mai ai le Faatonuga a le Faamasinoga e faapea, e solitulafono le Poloaiga a le Ao o le Malo na tuuina mai ile Aso Toonai 22 o Me, lea na tolo ai le tauaofiaga a le Palemene mo le faatautoina o Sui Faipule.
O le Tauofiaga la a le Palemene ile Aso Gafua o le vaiaso nei, o loo taoto tonu lava i manaoga o le Faavae o lo tatou Malo Tutoatasi, atoa ai ma le tulafono e ala i faaiuga a le Faamasinoga.
O faaaliga la a le malo le tumau e faapea, o le tauaofiaga ma le faatautoga na faia e le tusa ai ma le Faavae ma le Tulafono, e foliga mai o latou e tatau ona malamalama ma e tatau ona mumulimulita’i ile tulafono. E leai se mea o faanenefu e tusa o faaiuga a le Faamasinoga.
Ae talofa Samoa, ua outou silasila ma molimauina uma le mea na tupu ile Aso Gafua, o le faanoanoa loloto ona o le maualalo ma le maasiasi ua tatou oo iai, ile taunuu atu o sui filifilia e 26 o le atunuu, ua maea ona filifilia aloaia ile Poloaiga o le Aso 16 o Aperila, o le au faigaluega paia a le Atua, o le Alii ma Tamaitai o le Faamasinoga ma sui o le atunuu, ae ua loka mau faitoto’a o le Palemene - le Maota o le atunuu. Ua loka mau ma leoleoina e le malu o le Malo, ina ia taofia ai le faataunuuina o le tauaofiaga a le Palemene lona 17 o Samoa.
O le taeao lena, ina ua maea ona logoina le Failautusi o le Fono Aoao, o le a le auai le Ao ole Malo aunoa ma se mafuaaga na tuuina atu.
O le taeao foi lena Samoa, na faailoa mai ai ia te a’u ma le Sui Ta’ita’i, e le Sui o le Fono a Sui Tofia, na te le finagalo e tauaveina tiute o le Ao o le Malo ona o lona le auai.
O le taeao foi lena Samoa, na faailoa mai ai e le Falautusi o le Fono Aoao, a o faafofoga Samoa na potopoto, “ua noanoatia laulu o Taemanutava’e” ona ua faatonuina ia ma lona Ofisa e aua nei fesoasoani i soo se itu, i le faataunuuina o le sauniga. Ae sa matou galue faatasi ma le Failautusi i le tuneva ole po o le Aso Sa ma tapena le faamoemoe.
E ui i le ogaoga o tulaga faaletonu na tulai mai, ae na mau pea le faatuatua faatasi ai male malosi o le tatalo a le au faatuatua ina ia faia le mea sa’o ma le tonu e ao ona fai. Aemaise o le faatamai’a o le mamalu, male pule a lo tatou atunuu ma ona tagatanuu.
O lea na toe tauaofia ai ile itula e 5.00 i le afiafi i Eleele sa o le malae i Tiafau, le malae o le faautugatagi a le atunuu, le malae o loo lagomau ai o tatou tuaa, ma faataunuu ai loa le sauniga o le faatautoina o Sui faipule e 26, i fafo ane o le Maota Fono, o loo tutu mai ua na o se atigi fale, a’o taumafai e toe faafoi mai i aao o tagata o lo tatou atunuu Pulega malo faa temokalasi e pulea e tagata. Ma faamamaluina ai la outou filifiliga e ala i le palota ma toe taofi mau ai le mamalu o lo tatou atunuu na faatamaia ile taeao, ae toe fa’amapu’epu’eina ile afiafi, a o taputapua’i sui o Aiga o le tatou atunuu o loo ua fusia ai Samoa o se aiga e tasi, o le aufaigaluega paia a leAtua, o sui o Tumua ma Pule faapea o tatou tagatanuu.
E ao ona tatou tutumau i pulega malo faa temokalasi e tula’i i luga o le pule a tagatanuu.
Ma e lē tatau ona tatou see ese mai lena faavae.
Ma o le Aso Gafua na te’a nei, na toe faamautūina ai le pule a tagata ua fia tausaga o faalologo ma fifilemu, e ui i faiga soona fai a le pulega malo. Ae o lea ua toe faamautu le pule i outou aao e ala i e na outou filifilia i la outou palota, i le faiga malo tou te finagalo iai.
E laualuga i le sauniga o le Aso Gafua, le pule a le Tulafono lea na faataunuuina e tusa ai ma le Faavae o le tatou atunuu, faatasi ai ma faaiuga ma faatonuga na tuuina mai e le Faamasinoga.
O loo tumau pea ona solia le tulafono e le faiga malo le tumau ma lagolagoina pea e nisi o le au faigaluega a le Malo, ma taumafai ai fa’aaoga tulaga tofi ma le pulega, e talepe ai le Faavae i ni faiga soona fai ma le fa’atautala.
O nei faiga solitulafono, ua faaauau ai pea ona taotaomia ma faatamai’a le mamalu ma le igoa lelei o si o tatou atunuu.
O le fa’aauau pea o le musuā o le ta’ita’i o le faigamalo le tumau e talia lona malolo i le faiga palota, ua salalau atu nei I fafo ma le lalolagi atoa, ma o nei faiga, ua tosoa’ina atu ai faatasi ma le igoa lelei o Samoa… ma ua tatau ai ia i latou nei ona see ese… ma ia o ese vave.
Ae ua tatau ona amata le galuega a le faigamalo fou i lalo o la’u ta’ita’iga. Ma ua nofo sauni foi Minisita fou ua filiflia, o loo iai agava’a ma taleni e toe tau faufau si o tatou atunuu faatasi ai sui mamalu filifilia o le Palemene, ma le aufaigaluega a le Malo, aemaise e o loo fia tautua ia Samoa, ae le o tautuaina o se tagata se toatasi..
Ioe, atonu na fa’atautō a’u nei ma le faigamalo fou ma faipule fou i lalo o se falei’e. Ae manatu, e faapea foi le fanauga a Isaraelu i la latou faata’amilosaga i le 40 tausaga. Ma ina ua soifua mai le Faaola, na loka foi faletalimalo, ae o si fale faatauvaa lava o manu na soifua mai ai lo tatou Faaola.
O le auai atu o sui filifilia o le atunuu i le sauniga i Tiafau i le Aso Gafua na tea nei, o la latou tiute lea na faataunuu e ui i le musuā o le au faigaluega a le Malo e faatino o latou tiute ma mulimulita’i i le tulafono.
E ui i nei faiga ina ia aua nei fataunuuina le Sauniga, ae na tauaofia lava le Palemene lona 17 a le Malo Tutoatasi o Samoa i le aso na taupoina, 24 o Me 2021.
O loo mataitūina pea ma le toto’a gasologa o loo feagai ai nei, ma talosagaina ai pea le onosai ma le faapalepale o la outou tapuaiga Samoa. Ia to’a pe lea tai. E sau pea malama ile Alofa ma Agalelei o le Atua.
E faamuli ai se lagona i Taitai o Ekalesia ma le au fai tatalo. Faafetai mo a outou talosaga faifai pea. Tau ina ia siitia pea i lona nofoalii le viiga e le aunoa, i mea uma ua tatou faia.
Soifua ma ia Manuia Samoa!
Hon. Fiame Naomi Mataafa
Palemia Filifilia
Samoa